Uncategorized

面對面 蘋果咬一口 錢國偉

From Evernote:

面對面 蘋果咬一口 錢國偉

Clipped from: http://bbs.ent.163.com/bbs/tvb/146312626.html

面對面 蘋果咬一口 錢國偉

合作多年,這還是頭一次,攝影師比我更熱心採訪被訪者
被訪者是錢國偉,無綫電視綜藝及體育科節目監製,人稱「肥Wilson」、「金牌監製」,更為人熟悉的稱號是「鹹濕肥監製」
由錢國偉監製的遊戲節目《殘酷一叮》、《美女廚房》《味分高下》、《耳分高下》以及青春劇《四葉草》系列都是收視保證,夠晒出名。不過,更出名的是,錢國偉被傳03年對第一代四葉女黃婉伶(Race)和戴夢夢毛手毛腳、04年夜召第二代四葉女楊秀惠上房對戲最愛用改了生果飲品名的制服少女點綴節目,以及身邊總有幾個四葉女或味之天使陪食飯睇戲夜蒲。
目光艷羨的攝影師最關心的問題,也就是所有港男最關心的問題:「士多啤梨蘋果橙,你到底食咗幾多個?」
錢國偉說:「煮到埋口都唔敢食啦!你估我唔驚咩?o依家啲女仔,點知你有冇錄我音?有冇人破門影相?落到樓原來call咗成班記者嚟o架?」
照計,這種「一個都冇食過」的答案,本來不該收貨
不過,這年頭,o靚模橫行,為上位個個爭住爆大鑊,今天你說被方力申力溝、明天她唱夜店被側田摸……想咬一口蘋果?小心被蘋果反咬一口才真錢國偉的顧慮,有道理。
但不敢做啫,諗吓,斷估實有!

食唔過

18歲加入TVB,從office boy捱到今時今日堂堂一個金牌監製,25年辛苦建立的事業,今年43歲的錢國偉說,絕不能一朝斷送
「你唔好以為公司唔理!唔只幕前,幕後人形象都好緊要。梗係有人搵我傾偈啦!啲女幾個月貨仔,我十幾廿年,係唔係先?梗係唔會攞嚟博啦!啲女仔下下主動走埋嚟話同我影相,叫咗佢唔好,第二日已經擺上blog你擺上blog係好小事,但我會俾人以為又滾咗一件吖嘛!又捱兩棍呀大佬!」
說得是,藍莓香蕉桔就愛在blog晒同錢國偉的自拍,又嘟嘴仔又叫爸爸,親密得叫人毛管戙,很難不惹人遐想:「啲女嗌我做爸爸,喺心理學嚟講,咪唔想蝕底囉!我又要照顧佢,又唔搞得佢,咪醒目囉你估仲好似粵語殘片咁,人哋一行開,啲女就挨身挨勢投懷送抱咩?o依家啲女仔好醒目o架!搞風搞雨大把計,最緊要上到位,又唔蝕底畀你!」
明明做幕後,錢國偉用幕前人的說法「定型」來形容自己:「做戲我實係麥基曹查理嗰啲角色,唔只觀眾個個覺得我又鹹濕又變態,身邊嘅女仔一樣,成日驚我想食佢!好似腸粉,第一份工,好純好純,夜晚叫佢去function,幾驚呀,話夜阿媽唔畀喎!好多人羨慕我,唉,有苦自己知啦食又未食到,俾人鬧就鬧咗幾年。」

啲女嗌我做爸爸,喺心理學嚟講,咪唔想蝕底囉!我又要照顧佢,又唔搞得佢,咪醒目囉

唔係玩

生得肥頭耷耳眼細細,頭髮微鬈笑起來還有酒渦,左看右看,錢國偉真的如他自己形容,典型一副鹹濕中坑模樣再加上出名愛夜蒲,去到邊都梗帶住三五七個味之天使傍身,貪玩識食形象深入民心。
「唔係我真係鍾意玩!點解我同鄭伊健friend,因為我哋兩個都係嗰啲可以留喺屋企打十幾個鐘機嘅人吖嘛o依家時代唔同,節目唔係做完就算,都要帶埋啲女仔多啲曝光,宣傳好緊要。」宣傳不是公關的工作嗎?「我覺得一個成功綜藝節目,個監製唔親力親為唔得!好似台灣嘅綜藝節目,製作人都可以係皇牌!棒棒堂經理人(人稱Andy哥)都可以有fans!時代進步,我哋真係要做多啲嘢我又未結婚,跑得就跑啦!」
玩得有道理,錢國偉把一拖三五七條女亦講到合理化:「淨係帶一兩個出去玩,實俾人話我會食咗佢!一次過帶晒八個出去,斷估冇人以為我食得晒八個喇啩?」
說起大行其道的o靚模文化,錢國偉相當自豪,說是自己率先從日本台灣綜藝節目引進起用大量性感制服少女做布景板,才造就o靚模存在。我倒覺得,一個二個有名有姓的少女,去到錢國偉手上都成了粥粉麵飯生果飲品,讓人人都有了「容易食」的錯覺才真「改啲代號,都係為佢哋好。英文名喎,全世界有幾多個阿May呀?我個節目係講食物,順理成章咪改個食物名。一次過帶八個女仔出嚟,叫自己名喎,你試吓一次過讀出嚟聽吓?o依家士多啤梨蘋果橙、梳打奶茶忌廉賓,啲細路當歌仔咁唱!件事靚喎,又唔係豆豉薑葱,絕對唔會唔尊重佢哋

06年在第一輯《美女廚房》勝出成為美少女嘅廚神,07年再起用做《味分高下》嘅梳打,JJ賈曉晨,正是錢國偉一手捧紅

錢國偉愛蒲,逢蒲亦必定帶住大班女仔:「飛來蜢就冇,但無啦啦多咗好多男仔搵我玩,以為我一定多女仔介紹嘛!」《忽然1周》圖片

監製的節目有收視有口碑,還是台慶「最佳綜藝資訊節目獎」常客,06年,錢國偉就憑第一輯《美女廚房》得獎《忽然1周》圖片

同鄭伊健自《430穿梭機》時代相識,窮到試過一個飯盒兩份食,兩人至今仍是老死《忽然1周》圖片

一殼淚

被全世界當鹹濕佬,錢國偉唯一欣慰的是,家人和朋友信得過佢:「我喺西環長大,阿爸喺中環擺檔賣眼鏡,阿媽係家庭主婦,對落有兩個妹唔好睇我由細喺女人堆長大,屋企人同朋友最明白我:『肥仔?得個樣啫,真係有個女仔送上門,就到佢驚啦!』睇相佬都話,我桃花多,但真姻緣好遲至有
舊緋聞女友陳自瑤都公布了和王浩信的新戀情,承認心儀過的第一代四葉女之一的姚子羚則追求不成,對上一個05年落選港姐女友都嫁埋人,錢國偉說4年感情空窗的他,其實很寂寞「女伴或者one night stand,可能得,但女朋友,我唔信會因為工作關係換到返嚟。我拍拖,試過幾次俾人一腳踏幾船係工作令我冇得揀。到o依家,我都覺得唔可以怪啲女仔做電視呢行,興趣多過賺錢,大時大節要開工,又下下要同廿個港姐出trip拍外景。返到香港,咪俾我撞破佢同第二個囉,仲要係我朋友添講起以前拍拖嘅嘢,我次次都眼濕濕,不過冇人信……我對愛情仲好有憧憬,所以我咪拍到《四葉草》囉。我鍾意煲愛情劇o架,尤其係韓片最愛《我的野蠻女友》,有個男仔咁鍾意女朋友、咁願意為佢犧牲,我好buy……我拍起拖上嚟都係咁……不過都係冇人信o架喇

合作過的巨星無數,錢國偉對90年代性感女神葉玉卿讚不絕口:「o依家o靚妹就易搵,但有女人味又有內在美嘅,就好少遇到

92年第一次被委派為香港小姐遠赴瑞士拍攝外景,就要單拖帶200人大隊,黎明做嘉賓,是錢國偉的處男大project

女伴或者one night stand,可能得,但女朋友,我唔信會因為工作關係換到返嚟

信不信由你

緋聞多籮籮,錢國偉唯一承認真的追求過的,是第一代四葉女姚子羚(右一)

整個訪問過程,錢國偉重複最多的一句話是:「講咗,又係冇人信!」
不論士多啤梨蘋果橙,一個都冇食過;還是入行25年,飛來蜢一個都沒遇過;抑或自己其實唔花弗很專一,錢國偉講完都有一句包底:「講咗,又係冇人信!」
「你哋睇我繽紛,其實我返到屋企一個人,好down,真係好down返到公司同人講,又係冇人信:『你晒命啦!你畀番錢公司啦!』
心嗰句,其實我最易信人。不過這次,不相信錢國偉的,我估是他自己。

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s