Uncategorized

留星語 – 關於梁志健…… 森美

From Evernote:

留星語 – 關於梁志健…… 森美

Clipped from: http://eastweek.my-magazine.me/index.php?aid=24079

因為「處男下海」的劇集《法網追擊》,森美最近人氣急升,成為了很多周刊的封面對象:這本說他「首談家事狂哭」;那本「有圖有真相」大摷他的instagram,指他有戀足癖;再來,是指他患了抑鬱「借戀足減壓」

「入屋」程度強如此,森美說,這些都並非他曾期望過的結果。「人氣急升?唔覺我拍完呢套劇,個結果一啲都唔重要。」

那麼,可有為被指戀足和抑鬱而感到氣憤嗎?「車,我爛命一條!」他一副嘴藐藐的表情說「做咗娛樂圈咁多年都會知係乜嘢一回事,上天畀我有人認識,負責搞笑、o氹人開心,我係個entertainer,又唔係小生,又唔係學者,咁我要靠呢啲嘢搵錢賴以維生,咁我咪要entertain人哋囉。」

搞笑、幽默、轉數快嘴gel gel、經常蝦小儀,無可否認,這些都是我們多年來從電台、電視、電影或平面媒體所認識到的森美,然而,森美不過是他的藝名,現實中的他,叫梁志健—即是以下森美口中所說的「我」和「自己」

只要唔係作新聞,我就唔太嬲o架啦!話我「戀足」,幾得意呀!哈哈哈!本雜誌嘅人都有幻想力都勤力嘅,我個instagram入面都成千張相,裏面都唔多過六七張(女人)腳相,佢哋仲要搵咗啲唔係我影嘅都登埋出嚟!好似苟姑娘(苟芸慧),我只係影過佢嘅樣,咁佢哋連唔係苟姑娘嘅腳都話係佢,我咪要同苟姑娘講聲囉,我唔想佢以為我影咗佢嘅腳連佢都唔知但陳敏之呢,佢就一定知嘅,佢好鍾意影相,影完仲要我send番畀佢嘅。

在《法網狙擊》中,一場「全裸」出浴戲,惹來網民熱話,森美即時人氣急升

呢件事,我比較驚會影響我屋企。當我阿媽見到佢啲親朋戚友嘅時候,我阿媽會唔會因為呢個報道唔開心同尷尬呢?又譬如我阿爸,佢成日同人講:「我個仔好似我o架!」咁佢啲同事又會唔會因為佢個仔好似佢,都以為佢會鍾意腳呢?哈哈哈!仲有小朋友(他的兩個仔女)呢,如果佢啲同學笑佢,佢哋又識唔識得去對待呢?如果啲同學仔真係用新聞講嘅嘢嚟話佢哋,咁佢哋會唔開心架喎

至於我太太,都係冇嬲嘅,不過佢都有話我:「你又係衰嘅,做乜影人啲腳啫?」事實上我係有影過嘛,覺得靚咪影囉,都唔係因為sex去影,不過出到嚟並唔係自己腦裏面諗嗰樣嘢啫,咁以後我咪避忌吓囉

他的instagram除了有女足相,亦有多張女藝人大特寫,連小儀也是被攝對象

因為instagram中的女足照片,森美被指為戀足癖,及後更有說患有抑鬱的他要以此癖減壓「我同陳敏之拍劇時等埋位冇嘢做,大家咪玩吓影相囉!其實我個instagram數埋都冇十幅腳相!」

我喺商台做咗差唔多十五年,六七年前開始,我個人開始好唔開心,對所有嘢都好灰

主要原因,係因為我覺得自己係個資深嘅DJ,我希望我嘅節目可以做得好啲、再做得好啲再做得好啲,迫、迫迫、迫,惡性循環,最後我啲嘢做得仲差咗,有時甚至覺得有愧於同事,慢慢就少咗同佢哋聯絡、接觸,只要唔係開咪,我就會唔出聲,鼓埋泡腮,好似嬲咗成村人咁,仲愈嚟愈怕見人,愈嚟愈唔識同人溝通,所以,嗰陣嘅我,絕對係「森美社交有問題」!

三年前左右,我知道自己咁樣好有問題,有朋友就介紹我睇醫生,醫生話我係depress,即係抑鬱,仲係家族遺傳,要開藥畀我食我好記得,食第一粒藥時,我同朋友喺coffee shop飲緊茶,突然間:「蓬!」我feel到個腦上面好似有嚿雲開咗咁!開心番晒!就好似傷風食完藥,個鼻當堂通番晒一樣!我當時真係有番開心嘅感覺喺度!

頭兩年,我除咗要定期覆診之外,醫生仲要我做一個行為治療,每日喺本簿仔度,寫低自己開心嘅嘢開頭我發覺我寫唔到,好驚!醫生叫我夾硬寫,結果,我真係夾硬寫落去,又畫埋公仔,咁樣夾硬寫吓畫吓,兩、三個星期之後,我真係開始發覺自己生活上有好多好細微嘅嘢,都會令到自己好開心

一年前開始,我呢個病開始慢慢好番,唔使點樣再覆診,只係覺得有需要時,先食番藥,而且,有過呢個病,我發覺快樂比乜嘢都重要!

我有抑鬱,我太太(Veronica)對我冇乜嘢喎可能因為佢本身係個好獨立嘅人,有任何事,佢都好take it easy,所以對佢嚟講,我只係唔出聲成日鼓起泡腮啫,最多咪唔理我囉,影響唔係好大。

反而,因為我咁而受最多苦嗰個係小儀!佢係我屋企人以外,最親嗰個,日日都見到我,所以佢都用咗好多時間去忍受我o架!嗰陣好多時,我哋開咪嘅時候就好開心,一閂咪,我就會坐埋一邊,粒聲唔出,對任何嘢任何話題都冇興趣!每三個月就轉自己一輪節目,成日打畀佢churk住佢,叫佢畀心機啲、努力啲,又成日捉住佢開會度節目、諗個節目做成點,佢都曾經忍唔住同我講:「我冇拖拍,都係因為你!」

與小儀合作逾十年,森美感激她在自己患有抑鬱那幾年,一直包容

佢始終同我太太唔同,我有責任照顧我太太,佢要乜,我畀佢,好簡單;但小儀只係同我一齊工作,我唔需要照顧佢,所以佢真係比我太太仲慘!

後尾過咗幾年之後,我知道自己嘅問題,都有同小儀傾番,我都知佢嗰幾年真係好辛苦!不過好在,我同佢嘅性格,同喺螢幕度見到嘅我哋係啱啱調轉,佢本身個人比較樂天,天跌落嚟當被冚,又硬頸,有乜嘢唔妥就大鳴大放,唔會諗好多嘢,好放得開!

其實我依家嘅人生,真係幾開心o架!我除咗可以選擇做我鍾意嘅工作,仲有兩個好得意嘅小朋友,佢哋今年一個九歲(大仔)一個六歲幾(細囡),讀四年級同一年級,都幾精叻,讀書幾OK。

始終佢哋大部分時間都係媽咪湊,所以兩個都唔黐我,不過都有睇過我嘅電影同電視,仲會識問我:「你喺電視度返工架?」「你返工係咪返電視呀?」我都會乘機同佢哋講:「你爸爸嘅工作,係個搞笑角色,所以你喺學校做任何嘢,人哋都會覺得你係頑皮,所以你要比其他小朋友乖多啲啲」其實佢哋好多同學仔都知,我係佢哋嘅爸爸,不過佢哋間學校(聖保羅男女中學附屬小學)都幾多名人仔女讀,所以老師同同學都慣晒,會比較容易接受

我係個典型嘅阿爸,會錫個囡多啲,細路女,好可愛得意嘛!未有我個囡之前,呢個世界冇其他女人可以代替我太太;但當我個囡出世之後,呢個世界冇女人可以代替我個囡!哈哈!有時我夜晚上網睇電視,喺梳化度瞓着咗,我個囡朝早起身就會第一時間走嚟啜我,錫我一啖!好sweet!

森美的一對仔女(箭嘴),分別九歲和六歲,日常都是由他的太太(紅圈)照顧

阿仔呢,我好記得佢三歲時,有次同佢去旅行行街,佢見到條迪士尼公主裙,就猛同我哋講:「呢件princess裙嚟o架!媽咪係princess,我要買畀你!」嗰吓我覺得個仔好生性,好感動,直情喊咗出嚟!到近年有個夏天,我見到佢游水唔使用水泡,仲可以游自由式游到一個直塘,真係覺得佢大個,我都眼濕濕o架!

其實我以前對佢會比較嚴厲,佢一做錯就會打佢籮pat,不過我依家都開始學緊畀多啲關心同關愛佢——雖然我覺得自己唔算係一個好爸爸,唔係好識向身邊嘅人表達出我嘅愛

工作以外,森美也是個住家男人,閒時亦會親自接送仔女返學放學。

跟森美面對面做訪問的一個小時內,他在說話滔滔不絕的同時,眼球也幾乎沒有停頓過四周張望,跟我四目交投的時間,我想應該不夠五分鐘

他患有專注力失調,是個自小已有的病症,是他被確診有抑鬱時同時被發現的,沒得根治,只能服藥幫助調節「我以前讀大學,上堂三個鐘,我坐喺度個幾鐘已經想走!但寫嘢呢,我可以連續坐喺度三四個鐘都冇問題!專注力失調係咁o架,鍾意嘅嘢,會超專注,我依家有時想集中啲,都會早晚食藥。」

這種病患,通常都是IQ高,而他,則是十分高,有150!以IQ準則來說,屬於天才級!

「IQ高,最唔好係冇耐性,任何人講嘢唔夠三句,我已經唔想聽,所以你話我同小儀做節目,係咪大鑊先?佢IQ低EQ又低嘅!哈哈哈!不過咁個節目先會好聽,如果我鬧完佢,佢只係一句:『哦!』咁就好悶o架嘛!係咪先?哈哈哈!」

我作為旁觀者,點樣計,大鑊嗰個,都應該係小儀,哈哈

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s